سٹی42: کینال روڈ پر پیش آنے والے ایک افسوسناک حادثے میں باراتیوں سے بھری ایک ویگن بے قابو ہو کر نہر میں جا گری، جس کے نتیجے میں ایک شخص جاں بحق جبکہ 11 افراد زخمی ہو گئے۔

ریسکیو حکام کے مطابق حادثے میں زخمی ہونے والوں میں سے 3 افراد کی حالت تشویشناک ہے۔ تمام زخمیوں کو فوری طور پر طبی امداد کے لیے ڈاکٹرز ہسپتال منتقل کر دیا گیا ہے، جہاں ایک بچی، ایک خاتون اور ایک مرد کو تشویشناک حالت کے باعث آئی سی یو میں داخل کیا گیا ہے۔

ریسکیو ذرائع کے مطابق حادثے میں جاں بحق ہونے والے شخص کی شناخت 55 سالہ حنیف کے نام سے ہوئی ہے۔ جاں بحق شخص کی لاش کو قانونی کارروائی کے لیے مردہ خانے منتقل کر دیا گیا ہے۔

حادثے کی وجوہات جاننے کے لیے مزید تحقیقات جاری ہیں، جبکہ واقعے کے بعد علاقے میں خوف و ہراس پھیل گیا۔