کلیم اختر:  پنجاب سوشل سیکیورٹی نے سیلاب متاثرین کے لیے امدادی سامان سے بھرے 15 ٹرک روانہ کر دیے۔

روانگی کی تقریب میں صوبائی وزیر لیبر منشاء اللہ بٹ نے ٹرکوں کو روانہ کیا، جبکہ کمشنر سوشل سیکیورٹی محمد علی، وائس کمشنر توقیر الیاس چیمہ، ڈائریکٹر جنرل ہیڈکوارٹر اظہر حسین منہاس اور دیگر افسران بھی موقع پر موجود تھے۔

منشاء اللہ بٹ نے بتایا کہ یہ ٹرک 800 متاثرہ خاندانوں کے لیے راشن اور دیگر ضروری سامان لے کر روانہ کیے گئے ہیں۔ امدادی سامان میں ادویات اور کھانے پینے کی اشیاء شامل ہیں۔

انہوں نے مزید کہا کہ پنجاب میں سیلاب زدگان کو فوری ریلیف فراہم کرنے کے لیے سوشل سیکیورٹی کے تحت میڈیکل کیمپ بھی قائم کیے جا رہے ہیں تاکہ متاثرہ خاندانوں کو طبی امداد فراہم کی جا سکے۔