ایران میں پاکستانیوں کا قتل کے واقعہ پر پاکستان کا سرکاری ردعمل سامنے آ گیا۔ دفتر خارجہ  کی ترجمان ممتاز زہرا بلوچ  نے کہا ہے کہ یہ ایک ہولناک اور قابل نفرت واقعہ ہے اور ہم اس کی بلاشبہ مذمت کرتے ہیں۔اس طرح کے بزدلانہ حملے پاکستان کو دہشت گردی سے لڑنے کے عزم سے نہیں روک سکتے۔

ممتاز زہرا بلوچ  نے کہا کہ   ہم ایرانی حکام کے ساتھ رابطے میں ہیں۔ ہم نے واقعے کی فوری تحقیقات کرنے اور ملوث افراد کے فوری محاسبہ کرنے کی ضرورت پر زور دیا ہے۔ زاہدان میں ہمارے قونصلر اسپتال جا رہے ہیں جہاں زخمیوں کا علاج کیا جا رہا ہے۔ وہ مقامی حکام سے بھی ملاقات کریں گے اور سخت کارروائی کی فوری ضرورت پر زور دیں گے۔

ممتاز زہرہ بلوچ نے بتایا کہ اس سنگین معاملے سے پوری طرح آگاہ ہیں اور تمام ضروری اقدامات کر رہے ہیں۔ پاکستانی سفارت خانہ لاشوں کو جلد از جلد وطن واپس لانے کی پوری کوشش کرے گا۔ اس طرح کے بزدلانہ حملے پاکستان کو دہشت گردی سے لڑنے کے عزم سے نہیں روک سکتے۔