سٹی42 : مرکزی جلوس رنگ محل پہنچ گیا۔

یومِ عاشور (10 محرم الحرام) کے موقع پر نواسہ رسول حضرت امام حسین علیہ السلام اور ان کے جانثار ساتھیوں کی لازوال قربانیوں کی یاد میں لاہور کا شبیہِ ذوالجناح کا مرکزی جلوس اپنے روایتی راستوں پر گامزن رہتے ہوئے کشمیری بازار پہنچ گیا ہے۔
جلوس کی آمد پر عزاداروں کی بڑی تعداد سینہ زنی اور نوحہ خوانی میں مصروف ہے۔

 نثار حویلی موچی گیٹ سے برآمد ہونے والا یہ تاریخی جلوس مبارک حویلی، چوہٹہ مفتی باقر اور چوک کوتوالی سے ہوتا ہوا اب کشمیری بازار اور سنہری مسجد کے قریب پہنچ چکا ہے۔ یہاں سے یہ ڈبی بازار، گمٹی بازار اور بازارِ حکیماں سے گزرے گا۔
 جلوس اپنے طے شدہ وقت کے مطابق شام کو مغرب کے بعد کربلا گامے شاہ پہنچ کر اختتام پذیر ہوگا، جہاں شامِ غریباں کی جائے گی۔
 پولیس حکام کے مطابق جلوس کی سکیورٹی کے لیےپولیس اہلکار تعینات ہیں۔ حساس مقامات اور اونچی چھتوں پر اسنائپرز موجود ہیں اور سی سی ٹی وی (CCTV) کیمروں کے ذریعے جلوس کی فضائی اور زمینی مانیٹرنگ کی جا رہی ہے۔ رینجرز اور پاک فوج کے دستے بھی الرٹ ہیں۔
شدید گرمی کے پیشِ نظر انتظامیہ اور مقامی سبیلوں کی جانب سے عزاداروں کے لیے ٹھنڈے پانی اور لنگر کا وسیع انتظام کیا گیا ہے۔ ریسکیو 1122 اور میڈیکل کیمپس بھی راستے میں ہر قسم کی طبی امداد فراہم کرنے کے لیے مستعد ہیں۔