(سٹی 42) وزیراعلیٰ پنجاب چودھری پرویز الٰہی اور سی سی پی او لاہور غلام محمود ڈوگر کی ملاقات کی ویڈیو منظر عام پر آگئی۔
ذرائع کے مطابق وزیراعلیٰ پنجاب چودھری پرویز الٰہی اور سی سی پی او لاہور غلام محمود ڈوگر کی ملاقات کی ویڈیو مونس الہی نے سماجی رابطوں کی ویب سائٹ ٹویٹر پر شیئر کی ہے.
Well done!!! pic.twitter.com/tw0D5uLf8Q
— Moonis Elahi (@MoonisElahi6) September 21, 2022
ویڈیو میں دیکھا جاسکتا ہےکہ وزیراعلیٰ پنجاب سی سی پی او لاہور کو گلے لگارہے ہیں اور مخصوص پنجابی لہجے میں شاباش دے رہے ہیں، ایدھر آو جی !۔۔جپھا مارو، ویلڈن شاباش،اسیں تہانوں جان نہیں دینا۔
اس موقع پر وزیراعلیٰ پنجاب پرویز الہٰی نے سی سی پی او لاہور غلام محمود ڈوگر سے گفتگو کرتے ہوئے کہا کہ وفاق ہماری اجازت کے بغیر تبادلہ نہیں کر سکتا۔ وفاقی حکومت انتقام میں اندھی ہوچکی ہے، سی سی پی او کو وفاقی حکومت نہ ہٹاسکتی ہے نہ تبادلےکی مجازہے، سی سی پی او لاہور کو ہٹانے یا لگانے کا اختیار میرا ہے، وفاقی حکومت کے ہرغیرقانونی اقدام پربھرپوراحتجاج کرتےہیں۔
واضح رہے کہ وفاقی حکومت نے کیپیٹل سٹی پولیس آفیسر (سی سی پی او) لاہور غلام محمود ڈوگر کی خدمات واپس لے لیں اور انہیں اسٹیبلشمنٹ ڈویژن رپورٹ کرنے کا حکم دیا مگر وزیراعلیٰ پنجاب چودھری پرویز الٰہی نے غلام محمودڈوگرکو چارج چھوڑنے سے روک دیا اس معاملے پر پنجاب اور وفاق میں ٹھن گئی ۔