سٹی 42 : وزیراعظم شہباز شریف نے کہا ہے کہ خصوصی بچوں کا ہاتھ پکڑنا ہم سب کا اجتماعی فرض ہے اور حکومتِ وقت کی ذمہ داری ہے کہ ان بچوں کی فلاح و بہبود کے لیے تمام دستیاب وسائل بروئے کار لائے جائیں۔

وزیراعظم نے اسلام آباد میں آٹزم سنٹر آف ایکسی لینس کے سنگِ بنیاد کی تقریب سے خطاب کرتے ہوئے ادارے کے لیے 15 کوچز فراہم کرنے کا اعلان کیا اور ہدایت کی کہ یہ منصوبہ ایک سال کے اندر مکمل کیا جائے۔انہوں نے کہا کہ خصوصی بچے ہمارے اپنے اور پوری قوم کے بچے ہیں، جنہیں کسی صورت نظر انداز نہیں کیا جا سکتا۔

شہباز شریف نے کہا کہ اگر کوئی بچہ کسی ایک صلاحیت سے محروم ہو تو اللہ تعالیٰ اسے کئی دوسری صلاحیتوں سے نوازتا ہے، جنہیں درست رہنمائی اور سہولتوں کے ذریعے نکھارا جا سکتا ہے۔ 

 شہباز شریف نے خصوصی بچوں کی جانب سے پیش کی گئی کارکردگی کو سراہتے ہوئے کہا کہ بچوں نے جس محنت اور صلاحیت کا مظاہرہ کیا وہ لائقِ تحسین ہے۔ وزیراعظم نے یقین دلایا کہ حکومت خصوصی بچوں کے لیے ہر ممکن وسائل فراہم کرے گی تاکہ وہ معاشرے کا باوقار اور فعال حصہ بن سکیں۔