(ویب ڈیسک)بھارت کی فلم انڈسٹری بالی ووڈ کے معروف اداکار سلمان خان نے ایک حالیہ انٹرویو میں انکشاف کیا ہے کہ انہوں نے اپنے پورے کریئر میں کبھی کسی فلم کا مکمل اسکرپٹ نہیں پڑھا۔ میں نے انہیں لکھا ہے، لیکن کبھی پڑھا نہیں۔ اداکار کے مطابق وہ فلم کے ’’احساس‘‘، تجارتی اپیل اور مجموعی ٹریٹمنٹ کو سمجھ کر فیصلے کرتے ہیں۔ ان کے اس بیان نے سوشل میڈیا پر وسیع بحث چھیڑ دی ہے۔
بھارتی ذرائع ابلاغ کی رپورٹ کے مطابق سلمان خان نے اپنے فلمی کریئر سے متعلق ایک ایسا انکشاف کیا ہے جس نے مداحوں اور فلمی حلقوں کو حیران کر دیا ہے۔ بالی ووڈ کے سپر اسٹار نے اعتراف کیا کہ انہوں نے اپنی پوری زندگی میں کبھی کسی فلم کا مکمل اسکرپٹ نہیں پڑھا۔ ورائٹی انڈیا کے ساتھ ایک حالیہ گفتگو میں سلمان نے اپنے فلمی سفر، اداکاری کے انداز اور ذاتی طرزِ زندگی کے مختلف پہلوؤں پر کھل کر بات کی۔ تاہم سب سے زیادہ توجہ ان کے اس بیان نے حاصل کی جس میں انہوں نے کہا، ’’میں نے اپنی پوری زندگی میں کبھی کوئی اسکرپٹ نہیں پڑھا۔ میں نے انہیں لکھا ہے، لیکن کبھی پڑھا نہیں۔‘‘ اداکار کے اس اعتراف نے سوشل میڈیا پر فوری ردعمل کو جنم دیا۔ کئی مداحوں نے اسے سلمان خان کے منفرد اندازِ کار کی مثال قرار دیا، جبکہ بعض صارفین نے حیرت کا اظہار کیا کہ ایک اداکار بغیر مکمل اسکرپٹ پڑھے اتنے برسوں تک کامیاب کریئر کیسے چلا سکتا ہے۔

رپورٹ کے مطابق یہ پہلا موقع نہیں کہ سلمان نے اپنے کام کرنے کے مختلف انداز کا ذکر کیا ہو۔ ماضی میں بھی وہ کئی انٹرویوز میں یہ اشارہ دے چکے ہیں کہ وہ فلم سائن کرتے وقت مکمل اسکرپٹ پڑھنے کے بجائے فلم کے مجموعی ’’احساس‘‘، تجارتی صلاحیت اور کردار کے اثر کو ترجیح دیتے ہیں۔ فلمی تجزیہ کاروں کے مطابق سلمان خان کی اسٹار پاور ہمیشہ ان کے منفرد اسکرین پریزنس اور ماس اپیل سے جڑی رہی ہے، یہی وجہ ہے کہ ان کی فلموں کا انتخاب اکثر روایتی اداکاری کے معیارات سے مختلف سمجھا جاتا ہے۔ اسی دوران رتیش دیش مکھ نے ایک حالیہ مراٹھی انٹرویو میں انکشاف کیا کہ سلمان خان نے خود ان کی فلم میں شامل ہونے پر زور دیا تھا۔ دیش مکھ کے مطابق سلمان نے کہا تھا کہ آپ میرے بغیر فلم نہیں بنا سکتے، مجھے اس میں شامل ہونا ہوگا۔ اس فلم میں سلمان نے جیوا مہالا کا کردار ادا کیا ہے، جو چھترپتی شیواجی مہاراج کے ایک وفادار اور بہادر سپاہی کے طور پر جانے جاتے ہیں۔

 واضح رہے کہ سلمان خان اس وقت متعدد بڑے پروجیکٹس میں مصروف ہیں۔ وہ جلد ہی ’’ماتر بھومی‘‘ میں نظر آئیں گے، جس کی ہدایت کاری اپوروا لاکھیا کر رہے ہیں۔  اس کے علاوہ سلمان خان ایک اور بڑے پروجیکٹ SVC63 میں بھی کام کر رہے ہیں، جس کی ہدایت کاری وامشی پیڈیپلی کر رہے ہیں جبکہ اسے دل راجو پروڈیوس کر رہے ہیں۔