سٹی42: ڈی جی فوڈ اتھارٹی کی ہدایت پر لاہور میں ڈیری سیفٹی ٹیموں کی بڑی کارروائی، شہر میں جعلی دودھ کی سپلائی کرنے والی گاڑی کو گرفتار کر لیا گیا۔ کارروائی کے دوران 550 لیٹر سفید محلول تلف کر دیا گیاجبکہ گاڑی اور ممنوعہ نیلے ڈرم ضبط کر لیے گئے۔

ڈی جی فوڈ اتھارٹی عاصم جاوید کے مطابق، داخلی راستوں پر ناکہ بندیاں قائم کر کے مجموعی طور پر 2 لاکھ 77 ہزار 330 لیٹر دودھ کی چیکنگ کی گئی۔ گرفتار گاڑی کے مالک کے خلاف مقدمہ درج کر لیا گیا ہے۔

فوڈ اتھارٹی حکام کے مطابق، ٹیسٹنگ کے دوران دودھ میں پانی، پاؤڈر اور دیگر ممنوعہ اشیاء کی ملاوٹ ثابت ہوئی، جس کے بعد قانونی کارروائی عمل میں لائی گئی۔

ڈی جی فوڈ اتھارٹی کا کہنا تھا کہ جعلی دودھ کے نمونے مزید تجزیے کے لیے لیبارٹری بھجوا دیے گئے ہیں تاکہ مکمل سائنسی بنیادوں پر شواہد حاصل کیے جا سکیں۔

حکام کا کہنا ہے کہ عوام کی صحت سے کھیلنے والوں کے خلاف زیرو ٹالرنس پالیسی اپنائی گئی ہے اور ایسی کارروائیاں مستقبل میں بھی تسلسل سے جاری رہیں گی۔