وقاص احمد: لاہور کے علاقے گجرپورہ میں گیس لیکج کے باعث گھر میں آگ لگنے سے 25 سالہ نوجوان جھلس کر زخمی ہو گیا۔

پولیس کے مطابق متاثرہ نوجوان کی شناخت شاہ حسین کے نام سے ہوئی ہے، جو گھر میں اچانک آگ بھڑک اٹھنے کے باعث جھلس گیا۔

واقعے کی اطلاع ملتے ہی امدادی ٹیمیں موقع پر پہنچ گئیں اور زخمی نوجوان کو فوری طبی امداد کے لیے اسپتال منتقل کر دیا گیا، جہاں اس کا علاج جاری ہے۔

پولیس کا کہنا ہے کہ ابتدائی تحقیقات کے مطابق آگ گیس لیکج کے باعث لگی، تاہم واقعے کی مزید جانچ کی جا رہی ہے۔

حکام نے شہریوں کو ہدایت کی ہے کہ گیس کے آلات کے استعمال میں احتیاط برتیں اور کسی بھی قسم کی لیکج محسوس ہونے پر فوری حفاظتی اقدامات کریں تاکہ ایسے حادثات سے بچا جا سکے۔