سٹی42: پنجاب حکومت نے ماحول دوست ٹرانسپورٹ کے فروغ کے لیے اہم فیصلہ کرتے ہوئے سرکاری محکموں میں نئی پیٹرول اور ڈیزل گاڑیوں کی خریداری پر پابندی عائد کر دی ہے۔ اب آئندہ سرکاری محکمے صرف الیکٹرک یا ہائبرڈ گاڑیاں خرید سکیں گے، جبکہ فیلڈ ڈیوٹی پر مامور گاڑیاں پابندی سے مستثنیٰ ہوں گی۔
مزید براں، نئے پیٹرول پمپس کے این او سی کی منظوری اب صرف الیکٹرک چارجنگ یونٹ لگانے کے بعد ہی دی جائے گی، یعنی کسی بھی نئے پٹرول پمپ کو بغیر چارجنگ یونٹ کے کام کی اجازت نہیں ہوگی۔ چیف سیکرٹری پنجاب نے کہا کہ ماحولیاتی تحفظ کے لیے "گرین انرجی" کا فروغ ترجیح ہے اور صوبے میں نئی الیکٹرک وہیکل پالیسی جلد متعارف کرائی جائے گی۔
اس سلسلے میں 31 شہروں میں 170 نئے پیٹرول پمپس کے لیے ای-بز پورٹل کے ذریعے این او سیز جاری کیے گئے ہیں۔ ان میں فیصل آباد میں 29، لاہور 14، بہاولپور 10 اور خانیوال و بہاولنگر میں 9 نئے پیٹرول پمپس کھلیں گے۔ نئے پمپس پر الیکٹرک چارجنگ یونٹس کی تنصیب لازمی قرار دی گئی ہے تاکہ صارفین کو ماحول دوست ایندھن کی سہولت دستیاب ہو۔