عرفان ملک : ایف آئی اے انٹرپول نے بڑی کارروائی کرتے ہوئے پنجاب پولیس کوسنگین جرائم میں مطلوب اشتہاری ملزم کو اٹلی سے گرفتار کرلیا۔
ترجمان ایف آئی اے کے مطابق ملزم کو اٹلی سے گرفتار کر کے لاہور ائرپورٹ منتقل کیا گیا۔ گرفتار ملزم ابرار حسین کے خلاف سنگین دفعات کے تحت مقدمہ درج تھا۔ ملزم قتل کی دفعات کے تحت گجرانوالہ پولیس کو مطلوب تھا۔ ملزم کی گرفتاری کے لئے ایف آئی اے انٹرپول نے ریڈ نوٹس جاری کیا تھا۔
ترجمان ایف آئی اے کا کہنا ہے کہ ملزم کی حوالگی انٹرپول اسلام آباد کی انٹرپول روم کے ساتھ قریبی رابطہ کاری کی وجہ سے ممکن ہوئی۔ بعد ازاں ایف آئی اے امیگریشن لاہور نے ملزم کو متعلقہ پولیس حکام کے حوالے کر دیا۔
واضح رہے کہ این سی بی انٹرپول پاکستان بیرون ملک فرار ہونے والے ملزمان کی گرفتاری کے لئے گراں قدر خدمات سرانجام دے رہا ہے۔ انتہائی مطلوب ملزمان کی گرفتاری اور بروقت حوالگی کے لئے این سی بی انٹرپول پاکستان ہمہ وقت کوشاں ہے۔