ویب ڈیسک: پنجاب پولیس کی جانب سے سموگ اور فضائی آلودگی کی روک تھام کے لیے کارروائیاں جاری ، گزشتہ 24 گھنٹوں کے دوران سموگ کریک ڈاؤن میں 26 مقدمات درج کیے گئے اور متعدد قانون شکن افراد کو گرفتار کیا گیا۔
ترجمان پنجاب پولیس کے مطابق 464 افراد کو 10 لاکھ 55 ہزار روپے سے زائد کے جرمانے عائد کیے گئے جبکہ 87 افراد کو وارننگ جاری کی گئی۔
پولیس رپورٹ کے مطابق گزشتہ روز کے دوران فصلوں کی باقیات جلانے کی 52، زیادہ دھواں چھوڑنے والی گاڑیوں کی 145، صنعتی سرگرمیوں کی 5 اور اینٹوں کے بھٹوں کی 12 خلاف ورزیاں رپورٹ ہوئیں۔
ترجمان کے مطابق رواں سال اب تک مجموعی طور پر 2388 مقدمات درج اور 2106 قانون شکن گرفتار کیے جا چکے ہیں۔ 88 ہزار 981 افراد کو 23 کروڑ 8 لاکھ روپے سے زائد کے جرمانے عائد کیے گئے جبکہ 12 ہزار 966 افراد کو وارننگ جاری کی گئی۔
مزید تفصیلات کے مطابق فصلوں کی باقیات جلانے کی 1373، زیادہ دھواں چھوڑنے والی گاڑیوں کی 53 ہزار 420، صنعتی سرگرمیوں کی 1396 اور اینٹوں کے بھٹوں کی 2089 خلاف ورزیاں رپورٹ کی گئیں۔