ویب ڈیسک:قومی اسمبلی میں عمران خان کے خلاف تحریک عدم اعتماد کی کامیابی کے بعد سبکدوش ہونے والے وزیر اعظم کی حمایت میں ملک گیر مظاہرے جاری ہے، سابق وزیراعظم عمران خان کی حمایت میں کراچی تا خیبر عوام سڑکوں پر نکل آئے اور اپنا احتجاج ریکارڈ کرارہے ہیں۔
عمران خان کی وزارتِ عظمیٰ کے خاتمے کے خلاف ملک کے مختلف شہروں میں پی ٹی آئی کے مظاہرے جاری ہیں اس حوالے سے کراچی میں ڈالمیا کے علاقے ملینیئم مال پر مظاہرہ کیا گیا جہاں پی ٹی آئی کارکنوں اور حامیوں کی بڑی تعداد موجود تھی۔
لاہور سمیت پنجاب کے مختلف شہروں میں پی ٹی آئی کارکنان نے مظاہرے کیے اور ریلیاں نکالیں۔ لاہور میں لبرٹی چوک پر پی ٹی آئی کے کارکنوں کی بڑی تعداد نے عمران خان سے یکجہتی کا اظہار کیا۔
اس کے علاوہ اسلام آباد کے ایف نائن پارک میں بھی پی ٹی آئی کے کارکنوں نے مظاہرہ کیا جبکہ راولپنڈی میں لیاقت باغ پر مظاہرین موجود رہے دوسری جانب پشاور میں بھی پی ٹی آئی کے کارکنوں اور حامیوں نے ریلیاں نکالیں۔
اس کے علاوہ ملک کے دیگر شہروں میں پی ٹی آئی کےکارکنوں نے عمران خان سے یکجہتی کا اظہار کیا اس موقع پر انہوں نے ہاتھوں میں پارٹی کے جھنڈے اور بینرز اٹھا رکھے۔
خیال رہے کہ ہفتے کی رات قومی اسمبلی میں وزیراعظم عمران خان کے خلاف تحریک عدم اعتماد کامیاب ہوگئی جس کے بعد وہ اب ملک کے وزیراعظم نہیں رہے اور ساتھ ہی عدم اعتماد کے ذریعے ہٹائے جانے والے ملک کے پہلے وزیراعظم بن گئے۔