ویب ڈیسک : سپیکر قومی اسمبلی سردار ایاز صادق نے آئین کے آرٹیکل 248 کے تحت استثنیٰ لینے سے دوٹوک انکار کر دیا۔

 ایک بیان میں سپیکر قومی اسمبلی سردار ایاز صادق نے کہا کہ عوامی نمائندے قانون اور عوام کے سامنے جواب دہ ہیں،میں کسی قسم کا استثنیٰ نہیں چاہتا اور نہ ہی قبول کروں گا۔ عوامی نمائندے قانون اور عوام کے سامنے جواب دہ ہیں، یہی جمہوری اصول اور پارلیمانی اقدار کا تقاضا ہے۔

 قبل ازیں سینیٹ اور قومی اسمبلی کی پارلیمانی کمیٹی برائے قانون و انصاف کا مشترکہ اجلاس اسلام آباد میں منعقد ہوا، اجلاس میں آئینی عہدیداران کو استثنیٰ دینے کی تجویز زیر غور آئی۔ قائمہ کمیٹی کے چیئرمین محمود بشیر ورک  نے  تجویز پیش کی کہ چیئرمین سینیٹ اور سپیکر قومی اسمبلی کو بھی گورنرز جیسا آئینی استثنیٰ حاصل ہونا چاہیے۔

 سپیکر نے واضح موقف اختیار کیا کہ وہ نہ خود کسی استثنیٰ کے خواہاں ہیں اور نہ ہی اپنے عہدے کے لیے اسے قبول کریں گے۔