ویب ڈیسک :سندھ حکومت نے پیپلزبس اور ای وی ٹیکسی سروس میں نصب کیمروں کو سیف سٹی سے جوڑنے کا فیصلہ کیا ہے۔
وزیرٹرانسپورٹ سندھ شرجیل میمن نے کہا کہ پیپلزبس سروس اور ای وی ٹیکسی سروس میں نصب سسٹم کو سیف سٹی پروجیکٹ سےجوڑا جائےگا۔
انہوں نے بتایاکہ اس فیصلے کا مقصد عوامی ٹرانسپورٹ کےنظام کو محفوظ بنانا اور شہری علاقوں میں سکیورٹی کو جدید خطوط پر استوار کرنا ہے جب کہ کیمروں کے انضمام کے بعد ٹریفک مینجمنٹ اور عوامی تحفظ کے اقدامات میں بہتری آئےگی۔
سینئر وزیر کا کہنا تھا کہ حکومت دسمبرمیں جدید ای وی ٹیکسی سروس کے آغاز کے لیے بھرپور اقدامات کررہی ہے، کراچی سمیت سندھ کےشہریوں کو سستی، محفوظ اور ماحول دوست سفری سہولت حاصل ہوگی۔
شرجیل میمن نے مزید بتایا کہ ابتدائی مرحلے میں سروس کراچی میں شروع کی جائےگی اور بعد میں دیگر بڑے شہروں تک اس کا دائرہ بڑھایا جائے گا،ای وی ٹیکسی سروس کا منصوبہ عوامی سہولت اور معاشی ترقی میں بھی اہم کردار ادا کرے گا۔