درنایاب: سیکرٹری ہاؤسنگ پنجاب نورالامین مینگل نے لاہور ریلوے اسٹیشن اور اس کے اطراف جاری اربن ریجنریشن پراجیکٹ کا دورہ کیا، جہاں انہوں نے ترقیاتی کاموں کی پیش رفت، معیار اور رفتار کا تفصیلی جائزہ لیا۔
دورے کے موقع پر ڈی جی ایل ڈی اے طاہر فاروق نے سیکرٹری ہاؤسنگ کو منصوبے پر جاری کاموں کے حوالے سے بریفنگ دیتے ہوئے بتایا کہ ریلوے اسٹیشن سے منسلک وسیع پارکنگ ایریا کی تعمیر جاری ہے، جبکہ ریلوے اسٹیشن کے سامنے آٹومیٹڈ پارکنگ سسٹم کی تنصیب بھی جلد مکمل کی جائے گی۔
بریفنگ میں بتایا گیا کہ ملحقہ سڑکوں پر واقع تمام عمارتوں کی فساڈ اپ گریڈیشن مکمل کر لی گئی ہے، جبکہ ریلوے وال کی بیوٹیفکیشن اور اپ گریڈیشن کا کام بھی جلد مکمل کر لیا جائے گا تاکہ علاقے کی مجموعی خوبصورتی اور شہری سہولیات میں مزید بہتری لائی جا سکے۔
اس موقع پر سیکرٹری ہاؤسنگ نورالامین مینگل نے کہا کہ لاہور ریلوے اسٹیشن کے اطراف شہریوں اور مسافروں کے لیے جدید انفراسٹرکچر متعارف کروایا جا رہا ہے، جس سے سفری سہولیات اور شہری ماحول میں نمایاں بہتری آئے گی۔
انہوں نے متعلقہ حکام کو ہدایت کی کہ منصوبے کے تمام ترقیاتی کام مقررہ وقت میں مکمل کیے جائیں اور معیار و رفتار پر کسی قسم کا سمجھوتہ نہ کیا جائے تاکہ شہری جلد از جلد ان سہولیات سے مستفید ہو سکیں۔