ویب ڈیسک: ملک بھر کے ایئرپورٹس پر مسافروں کی سکیورٹی کو مزید مؤثر بنانے کے لیے نئی اور جدید اسکیننگ مشینیں نصب کرنے کا فیصلہ کر لیا گیا ہے۔
ذرائع کے مطابق اس منصوبے کے تحت سول ایوی ایشن اتھارٹی، پاکستان ایئرپورٹس اتھارٹی اور ایئرپورٹ سیکیورٹی فورس نے تمام بڑے اور چھوٹے ایئرپورٹس کا تفصیلی سروے مکمل کر لیا ہے۔
ذرائع کا کہنا ہے کہ جدید اسکیننگ مشینوں کی تنصیب سے مسافروں کے سامان کی بروقت اور بہتر اسکیننگ ممکن ہو سکے گی، جبکہ اس اقدام سے اسمگلنگ کی روک تھام میں بھی مدد ملے گی۔ اس کے علاوہ ایئرپورٹس پر مجموعی سیکیورٹی انتظامات کو مزید مضبوط بنانے میں بھی یہ مشینیں اہم کردار ادا کریں گی۔
حکام کے مطابق جدید اسکیننگ مشینوں کی تنصیب کا یہ منصوبہ اربوں روپے مالیت کا ہے، جس پر مرحلہ وار عملدرآمد کیا جائے گا۔