اسرار خان: سبزہ زار پولیس نے مختلف کارروائیوں کے دوران دو مبینہ منشیات فروشوں کو گرفتار کر کے ان کے قبضے سے بھاری مقدار میں منشیات برآمد کر لی۔

پولیس کے مطابق گرفتار ملزمان کی شناخت دانش اور وقار کے ناموں سے ہوئی ہے جنہیں خفیہ اطلاع پر کارروائی کرتے ہوئے حراست میں لیا گیا۔ دوران تلاشی ملزمان کے قبضے سے 1360 گرام چرس اور آدھا کلو گرام سے زائد آئس برآمد ہوئی۔

پولیس کا کہنا ہے کہ برآمد ہونے والی منشیات قبضے میں لے کر ملزمان کے خلاف انسداد منشیات ایکٹ کے تحت مقدمات درج کر لیے گئے ہیں۔

گرفتار ملزمان کو مزید تفتیش کے لیے انویسٹی گیشن ونگ کے حوالے کر دیا گیا ہے، جبکہ پولیس ان سے منشیات کے نیٹ ورک اور دیگر سہولت کاروں کے بارے میں بھی معلومات حاصل کر رہی ہے۔