سٹی42: اڈیالہ جیل سے ایک چونکا دینے والی "بڑی خبر" آئی ہے۔

پی ٹی آئی کے بانی کی ایک بہن عظمیٰ خان کی بانی اور بانی کی بیگم بشریٰ سے ملاقات ہوئی جس کے بعد بانی کی دوسری بہن علیمہ خان نے میڈیا کے نمائندوں کے روبرو دعویٰ کیا کہ اب عمران خان نے اپنے کارکنوں کو   پاکستان کے یومِ آزادی  14 اگست پر  "احتجاج" کرنے کی ہدایت کی ہے۔ بانی نے خیبرپختونخوا میں اپنے وزیراعلیٰ علی امین گنڈاپور کو "آپریشن بند کرنے کی ہدایت" بھی کی ہے علیمہ خان کے اس دعوے کی اب تک پی ٹی آئی کے کسی دوسرے لیڈر نے تصدیق نہیں کی۔

علیمہ خان کی اڈیالہ جیل کے باہر میڈیا کے نمائندوں سے گفتگو

  میڈیا میں شائع ہونے والی رپورٹس کے مطابق  علیمہ خان نے اڈیالہ جیل کے باہر میڈیا س کے نمائندوں سے باتیں کیں اور کہا،  اللہ کا شکر ہے ایک بہن عظمی خان کی بانی اور بشری بی بی سے ملاقات ہوئی۔
علیمہ خان نے کہا،  بانی نے بچوں کے پاکستان آنے کے بارے  میں پوچھا ہے۔
علیمہ خان نے کہا، "عمران خان کل کے احتجاج پر بہت خوش ہوئے ہیں۔" عمران نے ظلم و زیادتی دباو کے باوجود لوگوں کے احتجاج پر خوشی کا اظہار کیا ہے۔
علیمہ نے کہا کہ عمران  کو بتایا گیا  کہ کے پی اور پنجاب میں بھی لوگ نکلے ہیں۔

میڈیا رپورٹس کے مطابق  کل پانچ اگست کو پی ٹی آئی کے احتجاج کے سلسلہ میں اڈیالہ جیل کے باہر ارکان پارلیمنٹ نے جمع ہونا تھا جو اسلام آباد مین پارلیمنٹ ہاؤس سے ہی باہر نہیں نکلے، پنجاب، سندھ، بلوچستان اور خیبر پختونخوا میں کوئ قابلِ ذکر احتجاج نہیں ہوا، پنجاب میں پولیس نے کسی کے احتجاج کیلئے سڑک پر آنے سے پہلے ہی سینکڑوں سرکردہ لوگوں کو گرفتار کر لیا تھا۔

کل منگل کے روز ملاقات کا دن تھا لیکن کوئی بھی اڈیالہ جیل جا کر عمران خان سے نہیں ملا۔ کل سے لے کر آج بدھ کی شام تک بانی سے  ان کی بہن عظمیٰ خان کے سوا کسی کی ملاقات  رپورٹ نہیں ہوئی۔
علیمہ خان نے میڈیا کے نمائندوں کو بتایا کہ بانی نے کہا ہے وہ عوام کو خراج تحسین پیش کرتے ہیں۔ بانی نے کہا ہے ماضی کے ڈکٹیرز نے اتنا ظلم نہیں کیا جو آج ہورہا ہے۔
علیمہ خان کے مطابق بانی نے اپنی بہن عظمی خان سے ملاقات میں کہا," یحییٰ خان نے اپنے اقتدار کیلئے ملک تقسیم کیا۔آج بھی میڈیا کا گلا بند کردیا گیا ہے۔"
علیمہ خان نے بتایا کہ ان کے بھائی نے کہا ہے کہ "آزادی کیلئے قربانیاں دینی پڑتی ہیں۔"

14 اگست کو" احتجاج"
علیمہ خان نے دعویٰ کیا کہ ان کے بھائی نے "احتجاج"  کیلئے 14 اگست کی نئی تاریخ دی ہے۔ علیمہ خان کے مطابق خان نے کہا ہے، " 14 اگست کو سب لوگ نکلیں۔" عوام نے حقیقی آزادی کیلئے کھڑا ہونا ہے۔
علیمہ خان نے کہا، ملک میں "رول آف لاء"  ختم ہوچکا ہے۔

گرفتاریوں سے نہ ڈرو!

علیمہ خان نے بتایا کہ عظمیٰ خان کے ساتھ ملاقات میں ان کے بھائی نے اپنی (پی ٹی آئی کی) لیڈر شپ کو بھی پیغام دیا ہے کہ وہ جیل اور گرفتاریوں سے نہ ڈریں۔

پی ٹی آئی ضمنی الیکشن نہیں لڑے گی
علیمہ خان نے بتایا کہ ان کے بھائی نے واضح ہدایت کی ہے کہ جو لوگ نا اہل ہوئے انکی سیٹوں پر کسی کو کھڑا نہیں کرنا۔
علیمہ خان کے مطابق بانی نے کہا ہے کہ ناجائز طریقے سے لوگوں کو نا اہل کیا گیا ۔

عمران خان کی پاکستان کی بقا کی جنگ بند کرنے کی ہدایت
علیمہ خان نے یہ نہایت متنازعہ دعویٰ بھی کیا کہ کے  پی حکومت (خیبر پختونخوا حکومت) کیلئے بانی نے پیغام دیا ہے کہ" آپریشن بند ہونا چاہیئے۔" علیمہ کے مطابق ان کے بھائی نے کہا ہے کہ "اپنے لوگوں کے خلاف آپریشن پی ٹی آئی کے خلاف نفرت پیدا کرنے کیلئے کیا جارہا ہے۔", علیمہ نے کہا کہ "بانی نے کہا مسئلے کو جرگوں کے ذریعے حل کرنا چاہیئے۔"

علیمہ خان نے کہا،" اگر علی امین گنڈا پور آپریشن نہیں روک سکتے یہ انکو سوچنا چاہیئے کیا کرنا چاہیئے۔"