ویب ڈیسک: پنجاب حکومت کی جانب سے شبِ برات کے موقع پر بدھ 4 فروری کو عام تعطیل کا اعلان نہیں کیا گیا، جس کے باعث شہری پانچ کے بجائے چار دن کی تعطیلات سے لطف اندوز ہو سکیں گے۔
حکومتِ پنجاب نے ضلعی انتظامیہ کی سفارش پر 6 فروری کو لاہور میں بسنت کے موقع پر مقامی تعطیل کا اعلان کر دیا ہے۔ اس فیصلے کا مقصد شہریوں کو بسنت کی تقریبات میں بھرپور اور محفوظ انداز میں شرکت کا موقع فراہم کرنا ہے۔ اس تعطیل کی منظوری صوبائی حکومت نے ضلعی انتظامیہ کی تجویز پر دی۔
وزیراعلیٰ پنجاب مریم نواز نے اس حوالے سے اپنے ایکس (سابقہ ٹوئٹر) اکاؤنٹ پر وضاحت کرتے ہوئے بتایا کہ پنجاب 5 فروری کو یومِ کشمیر کی تعطیل، 6 فروری کو بسنت کی صوبائی تعطیل اور اس کے بعد ہفتہ اور اتوار کی چھٹیوں کے باعث ایک ساتھ چار دن کا لانگ ویک اینڈ منائے گا۔ وزیراعلیٰ نے کہا کہ وہ امید کرتی ہیں کہ عوام اس وقفے کو آرام، تفریح اور توانائی بحال کرنے کے لیے استعمال کریں گے۔
وفاقی حکومت کے اعلان کے مطابق 5 فروری 2026 کو یومِ کشمیر کے موقع پر ملک بھر میں عام تعطیل ہو گی، جس کا اطلاق وفاقی و صوبائی سرکاری اداروں، تعلیمی اداروں اور بیشتر نجی دفاتر پر بھی ہوگا۔ اس حوالے سے کابینہ ڈویژن کی جانب سے باضابطہ نوٹیفکیشن جاری کیا جا چکا ہے۔
یومِ کشمیر ہر سال کشمیری عوام سے اظہارِ یکجہتی کے لیے منایا جاتا ہے، جس کے دوران ملک بھر میں ریلیاں، سیمینارز اور دعائیہ اجتماعات منعقد کیے جاتے ہیں تاکہ کشمیری عوام کے حقِ خودارادیت کی حمایت کا اعادہ کیا جا سکے۔حکام کے مطابق ہفتہ اور اتوار کی چھٹیاں پہلے سے طے تھیں جبکہ بسنت کے باعث لاہور میں جمعہ کی تعطیل کا فیصلہ ٹریفک دباؤ کم کرنے اور سکیورٹی صورتحال کو بہتر بنانے کے لیے کیا گیا ہے۔
ڈپٹی کمشنر لاہور نے شہریوں کو ہدایت کی ہے کہ 18 سال سے کم عمر بچے بسنت کی تقریبات میں اہلِ خانہ کے ہمراہ شریک ہوں تاکہ نظم و ضبط اور تحفظ کو یقینی بنایا جا سکے۔