ویب ڈیسک: پاکستان میں ٹریفک حادثات کی بڑی وجہ ڈرائیوروں کی غفلت، لاپروائی اور ٹریفک قوانین کی خلاف ورزی قرار دی جاتی ہے، جس کے پیش نظر موٹر وے پولیس نے حادثات کی روک تھام کے لیے ایک اہم اقدام متعارف کرا دیا ہے۔
ڈی آئی جی موٹر وے پولیس سید فرید علی کے مطابق مسافر بسوں میں سیفٹی اور مانیٹرنگ کے نظام کو مؤثر بنانے کے لیے ڈیش کیمز لگانے کا باقاعدہ آغاز کر دیا گیا ہے۔ اس اقدام کا مقصد ڈرائیوروں کی نگرانی، ٹریفک قوانین کی پاسداری اور حادثات میں کمی لانا ہے۔
انہوں نے بتایا کہ ڈیش کیمز کے ذریعے ڈرائیوروں کی کارکردگی کی مسلسل نگرانی کی جائے گی، جس کے لیے ایک خصوصی سافٹ ویئر تیار کیا گیا ہے، جس میں ڈرائیوروں کا مکمل ڈیٹا محفوظ ہوگا۔
ڈی آئی جی موٹر وے پولیس کے مطابق مسافر بس مالکان کو پابند کر دیا گیا ہے کہ بغیر ڈیش کیم کے کوئی بس سڑک پر نہیں آئے گی، جبکہ ہر بس میں دو ڈرائیوروں کی موجودگی لازمی قرار دی گئی ہے۔ اس کے علاوہ فٹنس سرٹیفکیٹ کے بغیر کسی بھی گاڑی کو موٹر وے یا ہائی وے پر آنے کی اجازت نہیں ہوگی۔
سید فرید علی کا کہنا تھا کہ ڈرائیوروں کی بڑی تعداد ناخواندہ اور غیر تربیت یافتہ ہونے کے باعث جدید ٹریفک قوانین اور اصولوں سے مکمل آگاہی نہیں رکھتی، جس پر قابو پانے کے لیے نگرانی اور اصلاحی اقدامات ناگزیر ہیں۔