سٹی42:لاہور کے علاقے شاہدرہ میں شہری سے ڈکیتی کرنے والا ملزم پولیس افسر نکلا،  ملزم سب انسپکٹر عمار کو سی سی ٹی وی فوٹیج کی مدد سے گرفتار کر لیا گیا ہے۔

پولیس کے مطابق سب انسپکٹر عمار تھانہ نیو انارکلی آپریشنز وِنگ میں تعینات تھا اور اس نے تقریباً 10 روز قبل اسلامیہ کالونی کے علاقے میں ایک شہری سے ڈکیتی کی تھی۔ ملزم نے ایک ریکارڈ یافتہ ڈاکو کے ساتھ مل کر شہری سے 4 لاکھ 70 ہزار روپے لوٹے تھے۔

سی سی ٹی وی فوٹیج وائرل ہونے کے بعد ایس پی سٹی نے خصوصی ٹیم تشکیل دی جس نے کارروائی کرتے ہوئے سب انسپکٹر عمار کو مستی گیٹ پولیس کی مدد سے گرفتار کر لیا۔

 ملزم کو مزید تفتیش کے لیے سی سی ڈی کے حوالے کر دیا گیا ہے۔