( حسن علی ) حکومت کی جانب سے یوٹیلیٹی سٹورز کارپوریشن کو بیل آوٹ پیکج کی فراہمی کا وعدہ وفانہ ہوسکا۔ ملازمین نے احتجاج کی دھمکی دیدی۔ ملازمین کا کہنا ہے کہ بیل آوٹ پیکج نہ ملنے سے یوٹیلیٹی سٹورز پر فروخت کم ہوگئی، ملازمین کو تنخواہوں کی ادائیگی اور اخراجات پورے کرنا بھی مسئلہ بن گیا۔
حکومت کی جانب سے یوٹیلیٹی سٹورز کیلئے گزشتہ سال اکتوبر میں بیل آوٹ پیکج کا اعلان کیا گیا تھا لیکن پانچ ماہ کا عرصہ گزرنے کے باوجود ادائیگیاں نہیں کی جاسکیں، جس کے باعث کمپنیوں نے یوٹیلیٹی سٹورز پر اشیا کی سپلائی مکمل طور پر بند کر دی ہے۔ ملازمین کا کہنا ہے کہ حکومت کی جانب سے بیل آوٹ پیکج فراہم نہ ہونے کے باعث تنخواہوں کی ادائیگی اور اخراجات پورے کرنا مشکل ہو گیا ہے۔
ان کا کہنا ہے کہ مسلسل رمضان پیکج کا ذکر کیا جا رہا ہے لیکن تاحال عملی طور پر رمضان پیکج کیلئے کوئی اقدامات نہیں کیے جا رہے۔ ملازمین کا کہنا تھا کہ حکومت نے فوری طور پر مسائل حل نہ کئے تو اسلام آباد کا رخ کریں گے اور بھرپور احتجاج کیا جائے گا۔