فاران یامین:رائیونڈ کے علاقے کوٹ بابو خان میں ایک افسوسناک واقعہ پیش آیا، جہاں ایک رہائشی گھر کی بوسیدہ چھت اچانک گرنے سے ایک شخص جاں بحق جبکہ خاتون اور کم سن بچے سمیت تین افراد زخمی ہوگئے۔
ریسکیو حکام کے مطابق حادثے کی اطلاع ملتے ہی امدادی ٹیمیں موقع پر پہنچ گئیں اور ملبے تلے دبے زخمیوں کو نکال کر فوری طور پر قریبی ہسپتال منتقل کر دیا۔ جاں بحق ہونے والے شخص کی لاش بھی ملبے سے نکال لی گئی۔
ریسکیو ذرائع کا کہنا ہے کہ ابتدائی تحقیقات کے مطابق گھر کی چھت انتہائی بوسیدہ تھی اور لکڑی کی پرانی کڑیوں پر قائم تھی، جو کمزور ہونے کے باعث اچانک زمین بوس ہوگئی۔
واقعے کے بعد علاقے میں خوف و ہراس پھیل گیا، جبکہ متعلقہ ادارے حادثے کی مزید تحقیقات کر رہے ہیں۔ ریسکیو حکام نے شہریوں کو پرانی اور خستہ حال عمارتوں کی بروقت مرمت کرانے کی بھی ہدایت کی ہے۔