ویب ڈیسک : پنجاب کے گورنر سردار سلیم حیدر خان نے کہا ہے کہ پیپلز پارٹی کی سینٹرل ایگزیکٹو کمیٹی(سی ای سی) میں جو فیصلے ہوئے وہ 27 ویں ترمیم سے متعلق تھے۔ 

 گورنر سردار سلیم حیدر خان نے شہرِ قائد میں عبد اللہ شاہ غازی کے مزار پر حاضری دی۔ جس کے بعد میڈیا سےگفتگو کرتے ہوئے انہوں نے کہا کہ پیپلز پارٹی وفاق کے ساتھ کھڑی ہے، پی پی کا حکومت سے دو تین شقوں پر اتفاق رائے ہے۔ 

سردار سلیم حیدر خان نے کہا باقی بہت ساری شقوں پر اختلاف رائے ہے، جس پر ڈیبیٹ ہونی ہے، شہید ذوالفقار علی بھٹو نے قوم کو مشترکہ آئین دیا۔ انہوں نے کہاکہ مخالفین بھی 1973 کے آئین پر انگلی نہیں اٹھا سکتے۔  پیپلز پارٹی شہید ذوالفقار علی بھٹو کے دیئے ہوئے آئین پر کھڑی ہے، پیپلز پارٹی کوئی ایسا قدم اٹھانے کے لیے تیار نہیں، جو 1973 کےآئین کے منافی ہو۔