علی ساہی:حکومت کی جانب سے پٹرول سبسڈی اسکیم کے بعد ایک ہی دن میں 2 لاکھ 51 ہزار سے زائد بائیکرز نے رجسٹریشن کروائی۔
ڈی جی ایکسائز عمر شیر چٹھہ کے مطابق شہریوں نے 2 ہزار روپے سبسڈی حاصل کرنے کے لیے موبائل ایپ اور ہیلپ لائن کے ذریعے اندراج کروایا، جبکہ اب تک 51 ہزار بائیکرز کو سبسڈی جاری بھی کی جا چکی ۔
انہوں نے بتایا کہ رجسٹرڈ بائیکرز کو روزانہ کی بنیاد پر سبسڈی کی رقم ان کے اکاؤنٹس میں منتقل کی جائے گی۔ رجسٹریشن کے بعد شہریوں کا ڈیٹا محکمہ ایکسائز کی جانب سے تصدیق کے عمل سے گزارا جاتا ہے، جس کے بعد ادائیگی کے لیے آگے بھیجا جاتا ہے۔
ڈی جی ایکسائز کے مطابق فری بائیکس کی منتقلی کے بعد صرف 30 گھنٹوں میں 8 ہزار شہریوں نے بائیک ٹرانسفر کروائی، جبکہ عام دنوں کے مقابلے میں بائیک ٹرانسفر کی شرح میں تین گنا اضافہ ریکارڈ کیا گیا ہے۔
محکمہ ایکسائز کے اعداد و شمار کے مطابق 5 اپریل تک 2 کروڑ 20 لاکھ بائیکس کا ڈیٹا ایپ میں اپ لوڈ کیا جا چکا ہے، جس سے اسکیم کے دائرہ کار کو مزید وسعت دینے میں مدد ملے گی۔