ویب ڈیسک: امریکی ریاست الینوائے میں پولیس گردی کا ایک اور واقعہ سامنے آ گیا، تین پولیس اہل کاروں نے ایک مسلمان لڑکے کو پکڑ کر بے دردی سے پیٹ کر شدید زخمی کر دیا۔

تفصیلات کے مطابق  الینوائے کے علاقے اوک لان میں پولیس اہل کاروں نے مسلمان نوجوان کو بہیمانہ تشدد کا نشانہ بنایا، 17 سالہ ہادی ابو عطیلہ کو زمین پر الٹا لٹا کر 3 اہل کاروں نے خوب پیٹا۔

واقعے کی ایک راہگیر نے ویڈیو بنا لی، جو وائرل ہو گئی ہے، ویڈیو میں اہل کاروں کو مسلم لڑکے کو زمین پر لٹائے بے دردی سے مکے برساتے دیکھا جا سکتا ہے۔

تشدد کی ویڈیو وائر ل ہوئی تو پولیس نے وضاحت دی کہ ہادی کے پاس گن تھی، ہادی کو زخمی حالت میں اسپتال منتقل کیا گیا۔ پولیس کے بہیمانہ تشدد کے واقعے کے خلاف مسلم تنظیمیں سراپا احتجاج بن گئی ہیں۔

⚠️ Explicit Language ⚠️
Police officers in Oak Lawn, IL, were seen repeatedly punching a 17yo on the ground. Now Oak Lawn police are denying their brutal attack, claiming the teens injuries happened when he was tackled despite it being on video! We need accountability! pic.twitter.com/l62IdEwTGs

— Ben Crump (@AttorneyCrump) July 29, 2022

28 جولائی کو پریس کانفرنس میں اوک لان پولیس نے کہا کہ انھوں نے لائسنس پلیٹ کے بغیر جانے والی ایک کار کو روکا، گاڑی کے اندر سے بھنگ کی بو بھی آ رہی تھی، پولیس نے ڈرائیور کو گاڑی سے باہر آنے کو کہا، ڈرائیور نے اس کی تعمیل کی، لیکن ابو عطیلہ، جو کار میں سوار تھا، مبینہ طور پر بھاگ گیا۔

نیوز ویک کے مطابق مسلمان لڑکے ہادی کے وکیل زید عبداللہ کا کہنا ہے کہ ابو عطیلہ برج ویو، الینوائے میں ایک ہائی اسکول کا سینئر طالب علم ہے، جو حجام بننے کی تربیت لے رہا ہے۔

عبداللہ نے کہا کہ وہ یہ جاننے کی کوشش کر رہے ہیں کہ آیا واقعے کے وقت ان کے مؤکل کے پاس گن تھی، تاہم یہ تو واضح ہے کہ ہادی نے کسی پر کوئی گن نہیں تانی تھی۔اوک لان پولیس ڈیپارٹمنٹ کا کہنا ہے کہ بدھ کے واقعے کی اندرونی تحقیقات کی جا رہی ہے۔