(مانیٹرنگ ڈیسک) پی ٹی آئی چیئرمین عمران خان نے سینیٹر اعظم سواتی کی دوبارہ گرفتاری کی مذمت کرتے ہوئے کہا ہے کہ اس ریاستی فاشزم کے خلاف سب کو آواز اٹھانا ہوگی۔
پاکستان تحریک انصاف کے چیئرمین اور سابق وزیراعظم عمران خان نے سینیٹر اعظم سواتی کی ایف آئی اے کے ہاتھوں دوبارہ گرفتاری کو فاشزم قرار دیتے ہوئے سماجی رابطوں کی ویب سائٹ پر اس کی مذمت کی ہے۔
عمران خان نے کہا کہ ناانصافی پر اعظم سواتی نے ٹوئٹ کیا اور دوبارہ گرفتار ہو گئے۔ حیران ہوں تیزی سے نہ صرف بنانا ری پبلک بلکہ ایک فاشسٹ ریاست کی جانب بڑھتے جا رہے ہیں۔ اس ریاستی فاشزم کے خلاف سب کو آواز اٹھانی ہوگی۔
پی ٹی آئی چیئرمین نے مزید کہا کہ کوئی کیسے نہیں سمجھ سکتا کہ سینیٹر سواتی پر کیا گزری؟ حراست میں تشدد، بلیک میلنگ کی ویڈیو انکی اہلیہ کو بھیجنے کی تکلیف کو کیسے سمجھا جا سکتا ہے؟ نا انصافی پر ان کے جائز غصے، مایوسی اور سپریم کورٹ میں اپیل کے باوجود دروازے ان کے لیے بند رہے۔
I am shocked & appalled at how rapidly we are descending into not just a banana republic but a fascist state. How can anyone not understand the pain & suffering Senator Swati underwent with custodial torture & blackmailing video of him & his conservative wife sent to his family?
— Imran Khan (@ImranKhanPTI) November 27, 2022
واضح رہے کہ پاکستان تحریک انصاف کے سینیٹر اعظم سواتی کو آج ایک بار پھر گرفتار کرلیا گیا ہے ایف آئی اے سائبر کرائم ونگ نے گرفتاری کی تصدیق کر دی ہے۔
اے آر وائی نیوز کے مطابق ایف آئی اے کی 3 رکنی ٹیم نے اعظم سواتی کے فارم ہاؤس پر چھاپہ مارا۔ ایف آئی اے سائبر کرائم ونگ نے گرفتاری کی تصدیق کر دی ہے۔