ویب ڈیسک:پاکستان مسلم لیگ ن کی سینئر نائب صدر مریم نواز 21 جنوری کی بجائے اب 29 جنوری کو وطن واپس پہنچیں گی۔
ذرائع کا کہنا ہے کہ مسلم لیگ (ن) کی چیف آرگنائزر مریم نواز نے سیاسی حالات میں تبدیلی کے پیش نظر فوری وطن واپس آنے کا فیصلہ کیاہے , مسلم لیگ ن کی سینئر نائب صدر مریم نواز وطن واپسی کے بعد پنجاب کے مختلف اضلاع کے دورے کریں گی اور پارٹی رہنماؤں سے اہم ملاقاتیں بھی کریں گی, مریم نواز انتخابی مہم اور نچلی سطح تک پارٹی کو متحرک کرنے کے لیے ذمہ داران کو ٹاسک تفویض کریں گی۔
اس سے قبل مریم نواز نے پنجاب اور خیبرپختوانخوا اسمبلیوں کی تحلیل سے پیدا ہونے والی صورتحال کے پیش نظر 21 جنوری کو وطن واپس آنے کا فیصلہ کیا تھا لیکن وہ اپنی سرجری کیلئے جنیوا چلی گئی تھیں، مسلم لیگ ن کے قائد میاں محمد نواز شریف بھی ان کے ہمراہ تھے۔ انہوں نے وہاں اپنے معالج سے بھی ملا قات کی، نواز شریف نے جنیوا میں کچھ ذاتی ملاقاتیں بھی کیں، نواز شریف کے ہمراہ خاندن کے 2 مزید افراد بھی جنیوا گئے تھے۔
دوسری جانب کیپٹن ریٹائرڈ صفدر نے میڈیا سے گفتگو میں بتایا کہ انشاءاللہ مریم نواز کا شاندار استقبال کیا جائے گا ۔
واضح رہے کہ وزیرداخلہ راناثناء اللہ بھی گزشتہ روز نجی پرواز کے ذریعے اسلام آباد انٹرنیشنل ایئرپورٹ سے لندن روانہ ہوگئے، جہاں وہ پارٹی قائد نواز شریف سے اہم ملاقات کرکے ان کو ملکی مجموعی سیاسی صورتحال سمیت اہم امور پرتفصیلات سےآگاہ کریں گے۔