(مانیٹرنگ ڈیسک) پاکستان تحریک انصاف کی جانب سے امریکا میں لابنگ فرم کی خدمات حاصل کرنے کا انکشاف ہوا، ن لیگ کے رہنما اور وفاقی وزیر احسن اقبال معاہدے کی تفصیلات بھی منظر عام پر لے آئے۔
نجی ٹی وی کے مطابق تحریک انصاف نے چھ ماہ کیلئے پچیس ہزار ڈالر ماہانہ پر فرم فینٹن آر لوک کی سروسز حاصل کیں اور معاہدے کے مطابق کمپنی پی ٹی آئی کو پبلک ریلیشنز سروسز فراہم کرے گی، کمپنی پی ٹی آئی نمائندوں اور حمایت کرنے والوں کے ٹی وی انٹرویوز کا اہتمام بھی کرے گی۔
وفاقی وزیر احسن اقبال نے پاکستان تحریک انصاف اور لابنگ کمپنی کے درمیان ہونے والے معاہدے کی تفصیلات ٹویٹر پر شیئر کردیں۔ وفاقی وزیر نے پی ٹی آئی پر تنقید کرتے ہوئے کہا کہ شرم تم کو مگر نہیں آتی، عمران خان نے قوم میں امریکا کے خلاف سازشی تھیوری گھڑ کے ہیجان پیدا کیا ہوا ہے اور عمران خان امریکا سے ترلے اور معافی پر اتر آیا ہے۔
شرم تم کو مگر نہیں آتی!
— Ahsan Iqbal (@betterpakistan) August 12, 2022
قوم میں امریکہ کیخلاف سازش تھیوری گھڑ کے ہیجان پیدا کیا ہوا ہے خود امریکہ سے ترلوں اور معافیوں پہ اترا ہوا ہے۔پہلے ایلچی بھیجے، پھر سفیر سے خود منت سماجت کی اور اب lobbyist رکھ کے معافی تلافی پہ کام ہو رہا ہے۔اس کپتان کے کتنے چہرے ہیں کمپیوٹر بھی پریشان ہے pic.twitter.com/G57EnL7d7t
ن لیگی رہنما احسن اقبال نے کہا کہ عمران خان نے پہلے ایلچی بھیجے، پھر سفیر سے خود منت سماجت کی اور اب لابسٹ ( Lobbyist) رکھ کے معافی تلافی پہ کام ہو رہا ہے، اس کپتان کے کتنے چہرے ہیں؟ کمپیوٹر بھی پریشان ہے۔