(ویب ڈیسک)  محکمہ ٹرانسپورٹ پنجاب  کی جانب سے  انکشاف کیا   گیا  ہے  کہ لاہور میں  اگر ٹریفک کو  کنٹرول نہ کیا گیا تو  حد رفتار  25 کلومیٹر رہ جائے گی۔

تفصیلات کے مطابق محکمہ ٹرانسپورٹ  پنجاب کی جانب سے بہت اہم انکشافات کیے گئے ہیں۔  محکمہ ٹرانسپورٹ پنجاب  نے ٹريفک کی بہتری   کے  لیئے  10سالہ پلان حکومت کو دے دیا ہے  جس میں ٹرانسپورٹ، ٹریفک مینجمنٹ اور سڑکوں کی توسیع کے لیئے   7 کھرب 78 ارب روپے کے فنڈز   مانگے گئے  ہیں۔
محکمہ ٹرانسپورٹ پنجاب کی رپورٹ میں کہا  گیا ہے کہ لاہور کے 17 پبلک روٹس پر صرف 220 بسیں  ہیں جبکہ آٹو اور چنگچی رکشے ٹريفک کی روانی کو  متاثر کرنے کی بڑی وجہ  بنتے ہیں۔ شہر میں فوری طور پر 1ہزار 575 بسوں کی ضرورت ہے۔ رپورٹ میں یہ بھی دعویٰ  کیا  گیا ہے کہ فنڈز ملیں تو لاہور میں 10سال  کے عرصے میں  ٹریفک کے  نظام کو بہتر بنایا جاسکتا ہے جبکہ ان فنڈز سے سڑکوں پر فٹ پاتھ  بھی 10 فٹ تک چوڑے کیے جائیں گے۔ اور اگر  لاہور کی ٹریفک کے نظام کو بہتر نہ کیا گیا تو حد رفتار صرف 25 کلو میٹر رہ جائے گی۔