طیب سیف: اسلام آباد ائیرپورٹ پر سیریئن ائیرلائن کی کراچی سے اسلام آباد آنے والی پرواز میں تکنیکی مسئلہ کے سبب مسافر پرواز کی لینڈنگ کے بعد ایک گھنٹہ تک جہاز میں پھنسے رہے۔
معلوم ہوا ہے کہ سیریئن ائیر لائن کی فلائٹ ای آر 502 لینڈ کرنے کے بعد طیارہ میں سےمسافروں کو نکالنے کے لیے تکنیکی خرابی کے باعث بورڈنگ بریج نہ لگایا جا سکا ۔بورڈنگ بریج نہ لگنے سے مسافر ایک گھنٹہ جہاز کے اندر پھنسے رہے۔
جہاز کے عملہ نے انجن بند کر دیئے جس کے نتیجہ میں جہاز کا ائیرکنڈیشننگ سسٹم بھی بند ہو گیا اور لائٹیں بھی بند ہو گئیں۔ ائیر بس طیارے میں حبس کے باعث بہت سے مسافروں کی حالت غیر ہو گئی ۔جہاز میں بچوں سمیت بزرگوں کی بڑی تعداد سفر کر رہی تھی ۔
اسلام آباد ائیرپورٹ کےایوی ایشن حکام کا کہنا ہے کہ جہاز کا جی پی یو (گراونڈ پاور یونٹ) خراب ہونے کے باعث بورڈنگ بریج نہیں لگ سکا ۔ متبادل جی پی یو فراہم کر کے مسافروں کو نکال لیا گیا تھا ۔