سٹی42: پیپلزپارٹی کے ذرائع کا کہنا ہے کہ پنجاب میں گورنر کے عہدہ کے لئے کئی ناموں پر غور کیا جا رہا ہے۔ کہا جا رہا ہے کہ پیپلز پارٹی چونکہ سینیٹ کا چئیرمین جنوبی پنجاب سے لا رہی ہے اس لئے وہ گورنر کا عہدہ شمالی یا وسطی پنجاب سے کسی پختہ کار سیاستدان کو دے گی۔
پیپلزپارٹی صدارتی الیکشن کے فوراً بعد پنجاب اور خیبر پختو نخوا کے گورنر کے عہدوں کے لئے شخصیات کو سامنے لائے گی۔ پاکستان پیپلز پارٹی اور مسلم لیگ نون کے درمیان اشتراک کے معاہدہ کے مطابق پنجاب اور خیبر پختونخوا میں گورنر پاکستان پیپلز پارٹی کے مقرر کئے جائیں گے۔ پیپلز پارٹی کے ذرائع کا کہنا ہے کہ گورنر کے لئے ناموں پر مشاورت پارٹی میں کئی سطحوں پر لی جا رہی ہے تاہم فیصلہ صدر آصف زرداری کا ہو گا۔