سٹی42:  پاکستان مسلم لیگ ن کی چیف آرگنائزر مریم نواز نے عمران خان کے بیان پر ردعمل دیتے ہوئے کہا ہے کہ پہلے کہتا تھا 9 مئی کے حملے میں نے نہیں میرے کارکنان نے کیے، آج کہہ رہا ہے یہ سانحہ نواز شریف نے کرایا۔

سابق چئیرمین پی ٹی آئی عمران خان کے اڈیالہ جیل میں صحافیوں کے سامنے کئے گئے دعوے پر  مریم نواز کا ردعمل سماجی رابطے کی ویب سائٹ ’ایکس‘ پر سامنے آیا۔ مریم نواز نے ایکس پر اپنے آفیشل اکاونٹ سے ایک پوسٹ میں کہا کہ کیا تحریک انصاف کے لیڈران اور کارکنان نوازشریف سے ہدایات لے رہے تھے۔ 

پہلے کہتا تھا ۹ مئی کے حملے میں نے نہیں، میرے کارکنان نے کیے تھے۔ آج کہتا ہے ۹ مئی نواز شریف نے کرایا تھا۔ یعنی ۹ مئی کو تحریک انصاف کے لیڈران اور کارکنان نواز شریف سے ہدایات لے رہے تھے۔ واہ جی واہ ????

— Maryam Nawaz Sharif (@MaryamNSharif) December 4, 2023

واضح رہے کہ آج عمران خان نے اڈیالہ جیل میں سائفر کیس کی سماعت کے دوران میڈیا نمائندوں سے گفتگو کے دوران دعویٰ کیا ہے کہ 9 مئی لندن پلان کا حصہ تھا۔

عمران خان کا کہنا تھا کہ 9 مئی کو یاسمین راشد واضح طور پر کہہ رہی تھیں کہ لوگ اندر نہ جائیں، سی سی ٹی وی دیکھ لیں کہ لوگوں کو کون اندر لے کر گیا۔

عمران خان کا کہنا تھا کہ لندن پلان نواز شریف کو لانے اور انہیں جیلوں میں ڈالنے اور پی ٹی آئی کو ختم کرنے کے لیے تھا۔