اسلام آباد: چیئرمین پاکستان تحریک انصاف اور سابق وزیراعظم عمران خان نے آج بعد نماز جمعہ پرامن احتجاج کی کال دی ہے۔
سابق وزیراعظم عمران خان نے سماجی رابطوں کی ویب سائٹ ’ٹوئٹر‘ پر جاری کردہ بیان میں کہا ہے کہ عوام امپورٹڈ حکومت کی انسان کش پالیسیوں اور ہوش ربا مہنگائی کے خلاف بعد نماز جمعہ باہر نکلیں اور احتجاج ریکارڈ کروائیں۔
انہوں نے لکھا کہ ہماری حکومت نے کورونا کے دباؤ کا مقابلہ کیا اور 1200 بلین روپے کا معاشی پیکیج دیا اور اس سال صرف ہم نے سیلز ٹیکس کو صفر فیصد تک کم کیا اور اس کے علاوہ اپنے عوام کے تحفظ کے لیے 466 بلین روپے کی توانائی کی سبسڈی فراہم کی اور ہمارے لیے ترجیح ہمیشہ ہمارے لوگ رہے ہیں۔
Our govt sustained pressure of Covid & gave Rs 1200 bn worth economic package. This yr alone we reduced sales tax to zero percent & additionally provided Rs 466 bn energy subsidies to protect our public. For us our priority has always been our people.
— Imran Khan (@ImranKhanPTI) June 2, 2022
عمران خان نے کہا کہ امپورٹڈ حکومت نے پیٹرولیم مصنوعات کی قیمتوں میں 40 فیصد اضافہ کر کے ایک لیٹر پر 60 روپے بڑھا دیے۔
واضح رہے کہ حکومت نے پیٹرول و ڈیزل کی قیمتوں میں 30/30 روپے فی لیٹر اضافہ کر دیا ہے جس کی وجہ سے ملکی تاریخ میں پہلی مرتبہ پیٹرول کی قیمت 200 روپے فی لیٹر سے تجاوز کر گئی ہے۔
حکومتی اعلان کے تحت گزشتہ رات 12 بجے کے بعد سے پیٹرول کی نئی قیمت 209.30 پیسے فی لیٹر ہو گئی جب کہ ڈیزل 30 روپے اضافے سے 204 فی لیٹر میں مل رہا ہے۔
حکومتی فیصلے کے تحت لائٹ ڈیزل 178 روپے کا ہو گیا جبکہ کیروسین کی قیمت بڑھ کر 181.94 پیسے ہو جائے گی۔